Majalisar Jiha, majalisar ministocin kasar Sin, ta amince da ranar 19 ga watan Agusta a matsayin ranar likitocin kasar Sin. Hukumar Kula da Lafiya da Tsarin Iyali ta kasa da sassan da abin ya shafa za su kula da wannan, tare da bikin ranar likitocin kasar Sin ta farko a shekara mai zuwa.

Ranar Likitoci ta kasar Sin ita ce hutu na hudu na kwararru a kasar Sin, bayan Ranar Ma'aikatan Jinya ta kasa, Ranar Malamai da Ranar 'Yan Jarida, wanda ke nuna muhimmancin likitoci wajen kare lafiyar mutane.

Za a yi bikin Ranar Likitoci ta kasar Sin a ranar 19 ga watan Agusta domin an gudanar da taron farko na kasa kan tsafta da lafiya a wannan karni a birnin Beijing a ranar 19 ga watan Agusta, 2016. Taron ya kasance wani muhimmin ci gaba ga harkokin lafiya a kasar Sin.

A taron, Shugaba Xi Jinping ya fayyace muhimmancin aikin tsafta da lafiya a cikin dukkan hoton Jam'iyyar da kuma manufar kasar, tare da gabatar da jagororin aikin tsafta da lafiya na kasar a sabon zamani.

Kafa Ranar Likitoci yana da amfani wajen inganta matsayin likitoci a idon jama'a, kuma zai taimaka wajen inganta dangantaka mai kyau tsakanin likitoci da marasa lafiya.