ສະພາແຫ່ງລັດ ແລະ ຄະນະລັດຖະມົນຕີຂອງຈີນ ໄດ້ອະນຸມັດໃຫ້ວັນທີ 19 ສິງຫາ ຖືກກຳນົດເປັນວັນແພດໝໍຈີນ. ຄະນະກຳມະການສາທາລະນະສຸກ ແລະ ວາງແຜນຄອບຄົວແຫ່ງຊາດ ແລະ ພະແນກທີ່ກ່ຽວຂ້ອງຈະຮັບຜິດຊອບເລື່ອງນີ້, ໂດຍວັນແພດໝໍຈີນຄັ້ງທຳອິດຈະຖືກສະເຫຼີມສະຫຼອງໃນປີໜ້າ.

ວັນແພດໝໍຈີນ ແມ່ນວັນພັກວິຊາຊີບຕາມກົດໝາຍຄັ້ງທີ 4 ຂອງຈີນ ຫຼັງຈາກວັນພະຍາບານແຫ່ງຊາດ, ວັນຄູ ແລະ ວັນນັກຂ່າວ, ເຊິ່ງເປັນວັນທີ່ລະນຶກເຖິງຄວາມສຳຄັນຂອງແພດໝໍໃນການປົກປ້ອງສຸຂະພາບຂອງປະຊາຊົນ.

ວັນແພດໝໍຈີນຈະຖືກສະເຫຼີມສະຫຼອງໃນວັນທີ 19 ສິງຫາ ເນື່ອງຈາກກອງປະຊຸມອະນາໄມ ແລະ ສຸຂະພາບແຫ່ງຊາດຄັ້ງທຳອິດໃນສະຕະວັດໃໝ່ໄດ້ຈັດຂຶ້ນທີ່ນະຄອນຫຼວງປັກກິ່ງໃນວັນທີ 19 ສິງຫາ 2016. ກອງປະຊຸມດັ່ງກ່າວແມ່ນຈຸດສຳຄັນສຳລັບພາລະກິດສຸຂະພາບໃນປະເທດຈີນ.

ໃນພິທີດັ່ງກ່າວ, ທ່ານປະທານປະເທດ ສີ ຈິ້ນຜິງ ໄດ້ຊີ້ແຈງເຖິງຈຸດສຳຄັນຂອງວຽກງານອະນາໄມ ແລະ ສາທາລະນະສຸກ ໃນຮູບພາບທັງໝົດຂອງພັກ ແລະ ພາລະກິດຂອງປະເທດຊາດ, ພ້ອມທັງນຳສະເໜີແນວທາງສຳລັບວຽກງານອະນາໄມ ແລະ ສາທາລະນະສຸກຂອງປະເທດໃນຍຸກໃໝ່.

ການສ້າງຕັ້ງວັນແພດໝໍແມ່ນເອື້ອອຳນວຍໃຫ້ແກ່ການຍົກສູງສະຖານະພາບຂອງແພດໝໍໃນสายຕາຂອງປະຊາຊົນ, ແລະ ຈະຊ່ວຍສົ່ງເສີມສາຍພົວພັນທີ່ກົມກຽວລະຫວ່າງແພດໝໍແລະຄົນເຈັບ.