ក្រុមប្រឹក្សារដ្ឋ និងគណៈរដ្ឋមន្ត្រីចិន ថ្មីៗនេះបានអនុម័តថ្ងៃទី ១៩ ខែសីហា ដើម្បីកំណត់ជាទិវាគ្រូពេទ្យចិន។ គណៈកម្មការសុខភាពជាតិ និងផែនការគ្រួសារ និងនាយកដ្ឋានពាក់ព័ន្ធនឹងទទួលបន្ទុករឿងនេះ ដោយទិវាគ្រូពេទ្យចិនលើកដំបូងនឹងត្រូវប្រារព្ធឡើងនៅឆ្នាំក្រោយ។

ទិវាគ្រូពេទ្យចិន គឺជាថ្ងៃឈប់សម្រាកវិជ្ជាជីវៈស្របច្បាប់លើកទីបួននៅក្នុងប្រទេសចិន បន្ទាប់ពីទិវាគិលានុបដ្ឋាយិកាជាតិ ទិវាគ្រូបង្រៀន និងទិវាអ្នកសារព័ត៌មាន ដែលរំលឹកពីសារៈសំខាន់របស់គ្រូពេទ្យក្នុងការការពារសុខភាពប្រជាជន។

ទិវាគ្រូពេទ្យចិននឹងត្រូវបានប្រារព្ធឡើងនៅថ្ងៃទី 19 ខែសីហា ពីព្រោះសន្និសីទអនាម័យ និងសុខភាពជាតិលើកដំបូងនៅក្នុងសតវត្សរ៍ថ្មីត្រូវបានប្រារព្ធឡើងនៅទីក្រុងប៉េកាំងនៅថ្ងៃទី 19 ខែសីហា ឆ្នាំ 2016។ សន្និសីទនេះគឺជាព្រឹត្តិការណ៍សំខាន់មួយសម្រាប់បុព្វហេតុសុខភាពនៅក្នុងប្រទេសចិន។

នៅក្នុងសន្និសីទនេះ លោកប្រធានាធិបតី ស៊ី ជីនពីង បានបញ្ជាក់ពីជំហរដ៏សំខាន់នៃការងារអនាម័យ និងសុខភាពនៅក្នុងរូបភាពទាំងមូលរបស់បក្ស និងបុព្វហេតុប្រទេសជាតិ ក៏ដូចជាការបង្ហាញគោលការណ៍ណែនាំសម្រាប់ការងារអនាម័យ និងសុខភាពរបស់ប្រទេសនៅក្នុងយុគសម័យថ្មី។

ការបង្កើតទិវាគ្រូពេទ្យ គឺអំណោយផលដល់ការលើកកម្ពស់ឋានៈរបស់គ្រូពេទ្យនៅក្នុងក្រសែភ្នែកសាធារណជន ហើយនឹងជួយលើកកម្ពស់ទំនាក់ទំនងសុខដុមរមនារវាងគ្រូពេទ្យ និងអ្នកជំងឺ។